تارخنا عند جداتنا فكتبوه

أذ كان حاضر كل أمة ومستقبلها يستمر بمدى تأصلها في الماضي فمن الضروري تتكاثف جهود الجميع من أجل تسجيل تاريخنا الذي هو عند اجدادنا
وعليه وضعت لكم هذه المساحة التي اعتبرها حملة من اجل جمع أكبر عدد من القصص والحكاياة الشعبية والحكايات التي حدثت في الثورة وايضا الأشعار ونتمنى تذكروا المناسبة والحادثة التي بسببها نظم ذلك الشعر .
نعتقد فهمتوا يلا إلي عندوا عزوزة ولا شيخ اجبنا من عندوا والي ميجيبش راح يندم فيوم ما راح يفتح هذا الموضوع ويقول قالت جدتي ولا جدي .

هذا الموضوع اهمني كثيرا كما يعني الكل سوفي نتمنى عدم التجاهل ومهما كان ما تقدمه قليلا فهو حلقة في سلسلة اسمها الأدب الشعبي السوفي .

محسبتكمش الهاذي الدرجة بخلاء لكن لن استسلم راح نجمع وحدي وهاذي أول قصة شعبية :
كاين واحد اسموا العطيوي ، كان يحكي مع صاحبوا ،قاله صاحبوا :أنا مرتي متخرجش خلاص من الدار،قالوا العطيوي : منصدقش كاين مرأة متخرجش من دارها . وراح نوريلك بلي تخرج
راح العطيوي للنزله ( الحي) انتاع صاحبوا فشكل مجنون و بدا يغني ويقول ( غرز عميش يامطمه - خنونته سايله على فموا ) بدات النساء تتجمع حوله وتنادي على بعض ويقولن مجنون ارواحوا نتفرجوا وهو يغني و النسا يضحكن عليه وهو يخزر فمرت صاحبوا مليح وكي حفظ اوصافها قال ليهن : يرحم العقون ومرحوم إفاده من عريان اعليكن ولا الضحك عندكن عادة
في هاذ الوقت عرفنه النسوة وهربن إلى بيوتهن وراح العطيوي الصاحبوا وقالوا :مرتك عندها الفستان الفلاني قالوا : نعم .وزاد قال لعطيوي :عندها الخمار الفلاني قالوا : انعم
راح الراجل الداروا حاير وقال المرتوا اليوم واش صرا ،قاتلوا جا عقون للنزله وتقرجنا عليه .قاللها : انتي العقونه وحكالها بلي صرا بينه وبين العطيوي

معليشي يا بخلاء هاي قصة اخرى :
كاين زوج اصحاب العمر كامل مع بعض قال واحد منهم للأخر كي نموت اديني ادفني في المكان الفلاني , نهار مات حملوا على كتفوا وبدا يمشي بيه حتى وصل للمكان بعد 3 ايام فقام لدفنه ولما كان راح يوضعوا فالقبر تمزقت لحيته من طول المدة , وكي دفنوا كان الليل حل قال الراجل نرقد هنا حتى الصباح نعود للديار , فلما نام الرجل خرج له صديقه في المنام وقال له : آآآه يا صحيبي قد ما تصاحبنا سلختلي لحيتي ففزع الرجل وفر هاربا كملت الحكاية

قالك بكري كاين عجوزة حوس عليها راجلها القاها في كوري الغنم تجمع في الصوف المتساقط من الخرفان , سألها واش راكي ديري .قاتلوا: نجمع فالصوف .قال لها : واش راح ديري بيه .قاتلوا: راح نعمل منوا وزرة . قالها الوزرة واش تعملي بيها .قاتلوا نبيعها ونشريها عنزة نحلبها ونخضها ونجمع الدهان - السمن- فمسك الشيخ يدها واكسرها وقالها هاي اليد الي راح تحلب .

قالك بكري كان واحد غني ياسر , وكان عندوا غير بنت وحيدة , توفت امها جابلها مرت أب وقاللها : أنا بنتي بنت عز وكل مالي ليها ومنحبك تخدميها والوا وكل حاجة تستحقها كاين مال باباها اعيشها العمر والزايد .
لكن هاذيك زوجة كانت كل ما يخرج الاب تعلم هاذيك البنت الغزل والنسيج وياسر حاجات وتقلها خبي على باباك .
وكي كبرت البنت جاها مكتوبها وتزوجت من واحد فقير ,وكان الاب دايما يرسل لها المال وكل ما تحتاجه , حتى كبر الاب واصبح عاجز عن العمل , وبدأ مال الاب يشح واصبحت الفتاة تشتغل وتكسب المال وتبعث بالمال لأبيها وزوجته , فبدأ الاب يسأل عن المال الذي عند ابنته فبعثت له رساله كتبت فيها ( فرغ مال الجدين ويقي مال اليدين ) كي مفهمش الرساله قاتلوا مرتوا بلي مال الجدين مالوا هو ومال اليدين ما علمتها اياه من صنعة فشكرها زوجها على صنيعها .

والله كان اتفشلوا الواحد هاتونا قصة حتى كذب
اسمعوا هاذي القصة القصيرة
كاين طفلة جا واحد يخطبها , لكنها مش حابه تتزوج بيه لكن والدها اجبرها انها تقبل بيه.
وحد النهار قالها باباها راح اجي الراجل اشوفك وجدي روحك
راحت لبست ووجدت روحها مليح وطبخت حريرة قمح - دشيشة- بالسوفي وكي جا الراجل حطتهالوا في قصعة وقعدت معاهم هو وباباها , وبدات تحمل الحريرة بيديها وترفعها تسقط هاذيك لحريرة على ساق يدها , فتخرج لسانها وتلحسها وتقول الياباها اكل يا بابا طيبة ياسر .
العريس قال هاذي -عقونة- معتوهة هرب مزادش رجع وتخلصت منه .

السلام عليكم
لن أقول قالت جدتي ولا قال جدي ولكن سأحكي واحدة للأجداد
قالك كين واحد المراة جمرا يعني واعرة لي يتزوجها
تمشيه علي يديها واحد ما قدرلها الكل طلقوها
ايا واحد الشيخ فرر يتزوج امالا حب يتزوج بهديك الجمرة
قالولو يا راجل أخطيك هديك مرا تعييك والله ما تقدر تعيش معاها نهار
قالهم رايح نتزوجها وبعد نشوف
اي غامر وتزوجها
قالك اليوم الاول خرج معاها
راح هو وكلب عند وحمار وفروج
وكان حامل منجل ديالو
كي مشاوشويا بد الفروج يقاقي حكم دبحو
قاتلو لمرا علاش قتلتو ؟ ما جاوبهاش وكمل يمشي
مشا شويا بدا الكلب ينبح زاد دبحو
قاتلو علاش دبحتو بلا سبة ؟ما جاوبهاش
كمل يمشي ايا شويا وبدا الحمار يصهل زاد دبحو
بدات المرأة تعيط علاش راك تدبح فيهم بلا سبب
قالها كي نكون انا نمشي واحد وما يتكلم بلا ما يشاورني
والدور الجاي عليك
قالك من هداك النهار وهي عاقلة
الله يبارك على الرجال نتاع بكري

مشكور

كاين واحد اتزوج مرأة كل يوم تفيق الصباح تقلوا : البارح حلمت صبعي دخل فجسمك قد هاك
وحد النهار قالها حنيلي صبعك قدر ميدخل فيا باه نشوف . كي حناتوا ورتهالوا ، حكم صبعها وقطعوا بالسكين , قاتلوا [color=green]علاه قالها باه ميزيدش يدخل فيا .[/color]

قالك كان بكري مرأة قبيحة جدا وكتب ربي وتزوجها رجل جميل , هذاك الراجل كل ما يقلوا واحد علاه مديها وهي مش مزيانة ، إقلهم أنا نشوف هيها اجمل مرأة فالعالم ، مرت الأيام هاذيك المرأة حملت وولدت وكي جا راجلها دخل باه يطمن عليها بعد الولادة ، قالت أمها بنتي بشعة وزيد تعبانة من الولادة ، فمجرد ما دخل الزوج غطت وجه بنتها حتى ميشوفهاش ، نهار ريحت الزوجة طلقها زوجها ،كي سألته أمها على السبب قالها : نهار غطيتيها تغطى زهرها معاها
فالزوج رأى أنه مدام حتى أمها تشوف فيها بشعة معناها بشعة فطلقها

هاذه أحد قصص الحيوانات عند أجدادنا:
قالك الذيب قالوا له علاه راك ترهق فنفسك راه الرزق على الله ، وما عليك غير تريح روحك وراح إجي العندك ، حكم الذيب ظل شجرة وريح حتى مر عليه قطيع غنم وهو اقول فنفسه أكيد راح اجيني رزقي ، حتى مرت عليه نعجة مكسرة إستناها ما جاتوش قفز عليها الذيب وقال :
كل المكتوب ومعاه تنقيزة - قفزة -

وهاذي قصة الذيب والكلب :
وحد النهار القا الذيب الكلب قرب حظيرة الغنم قفز عليه قريب يقتلوا ، قالوا الكلب وش بيك ، قالوا الذيب باه ناكلك ، قالوا الكلب راني منصلحش للأكل خلي راه صاحبي داير زردا هاذ الأيماة
كي نسمن أرواح تاكلني ، راح الذيب ورجع بعد وقت القا الكلب فوق الزريبة ، قالوا أرواح ناكلك كيما اتفاهمنا ، رد عليه الكلب :
المرة الجاية كي تلقاني أكلني متستنا حتى زردة
عبر القصة :الحياة فرص فإذا أتتك فرصة لا تتركها. - العقل مع الضعف قوة والقوة مع الغباء ضعف .
وشكر لمن حكت لي هذه القصة

أبدعت وتألقت
سلمت لنا يمناك على كل حرف خطته على
كل كلمة رسمتها
عذرا لتقبل عباراتي المتواضعة
فلم اجد الحروف التي تليق بسمو قلمك
التي قد تلملم ردا يناسب روعة ما
قدمته
لك ودي وجل تقديري

مشكووووووووورين جميعا مع اني تمنيت تساعدوني هاذا مشروق يقوم وينجح بمساهمة الكل
نتمنى عليكم تحكولنا حكايات رسخت فأذهانكم من عند امهاتنا وأباهاتنا ، نظن يستحقوا نكتبوها على جال نحفظوا ذكرياتهم الحلوة .

قالك بكري كاين زوج اصحاب واحد قال للأخر قول : ربي يجيرنا من دعوة الحق والباطل قالوا صاحبوا: أنا ما نعمل ما نخاف
زاد قالوا : خاف من ربي ومن الي ما يخاف من ربي رد عليه لا أنا نخاف غير من ربي.
هاذاك الراجل الي قال ما نعمل ما نخاف نزل فبادية عند واحد يعرفوا ، كي رقد فليل جات مرت مولا الدار وقتلت راجلها بسكين وحطتها فوق راس الضيف ،والصباح بدات تعيط وجمعت الجيران وقالت ليهم: هذا الضيف قتل راجلي وهذي السكين فوق راسوا ثما عرف بلي كلام صاحبوا صحيح
و ربي يجيرنا من دعوة الحق والباطل

مذكرات
المجاهد
العربي بلول بن محمد الصالح
وادي سوف

1956ـ 1962
كتاب يحكي فيه على حياته ونضاله في سبيل الحرية ونيل الاستقلال
هذ احد الوسائل للحفاظ على التاريخ القديم