جحا السوفي - من الادب العربي مترجم للهجة السوفية

يا حجاتك يا مجاتك...قالك في زمااااان بكري كان وحد الراجل اسمه " جحي "، في نهار من النهارات ناض من نومه واستفتحه يوم بدعاء الاستيقاظ للعلم جحي كان إنسان تقي يخاف من ربه

بعد ما شرب جحي قهوته خرج من حوشه قالك نروح نخدم عن روحي اليوم يزيني من القعاد .

هاو يمشي جحي لقي في طريقه عود [ حصان ] سمح قالك جحي لمن هالعود قربله شوي عجبه النظافة اللي فيه والصحة اللي عن العود ، جحي قال في نفسه لمن هالعود ؟ وصاحبه وينه مخليه وحده ؟
خاف جحي عش يشوفوه الغاشي مالا خلاه وقال هيا ندرق ، و نشوفه من بعيد بش نعرفه لمن ؟ راكم عارفين الشغبة ...

مشى جحي بش يدرق بصح العود بقي يتبع فيه تقلق جحي من العود عش يجيبله شبهة ويقولوا جحي راه سرقه ولا حاجة مالا قعد يمشي ويسحت فيه مرة يحاجره ومرة يغبر عنه " روح اخطاني ... فكني ... الله يبارك فيك برا روح " بصح العود بقى يتبع فيه .
سحت سحت محبش يروح مالا جري جحي والعود لاحق وراهب صح درق جحي وراء شجرة واختفى عن العود ، تنهد جحي وقالك هيا تهنيت منه بصح العود قعد يفتش عنه منة ومنة حتان طاح بيه .

حجا تقلق وقال في نفسه تو تصرالي مشاكل مع صاحب العود ونوحل فيه ، قعد جحي يخمم وش يدير مع هالعود حتان جت في باله انه يروح بيه للسوق . ركب جحي العود وعول على ربي

هاو يمشي بيه جحي حبس حذا دار الوالي قال للعود اقعد هني ، دخل جحي وعاد يتكلم مع الشرطي دخل عليهم العود | شكله عز عليه جحي | ، تحشم جحي في حضرة رئيس الشرطة فحكاله القصة هاو كيفاه لقيته وراه تعلق بيا ، قاله رئيس الشرطة بارك الله فيك يا جحي والله اللي كيفك قلال روح ربي معاك وراه العود معانا رح نديروا اشهار ونفتشوا عن صاحب اذا لقيناه في هالشهر هذا نرجعوه لمولاه واذا قعد عندنا وصاحبه مجاشي رح يكون لك .

راح جحي وبعد شهر رجع الى مركز الشرطة بش يطمئن على العود ، هاو سلم على رئيس الشرطة وبدوا يتحدثوا على العود قاله رئيس الشرطة راه درنا اشهار عن العود الغادي واستنينا صاحبه مكاين حتى شئ ، ورح نعطوهلك بصح اعطينا وش خسرنا عليه في شهر ، قال جحي معليش وقديش خسرتوا ؟

خرجله رئيس الشرطة قائمة فيها وش صرفوا على العود قالها جحي معليش تو نعوضلكم واعطاهم جحي وش كلى العود في مدة وشهر و بقي يستنى في العود بعث رئيس الشرطة خدام عنده قاله روح هات العود بصح كي خرجه شاف العود ضعييف ويابس شفه جحي العود وقال في نفسه وعنواش نعوض ونايا خليته خير من هكة ، هز جحي العود وقلبه يتقطع عليه وشافه في هالشهر وش كانوا يديروا بيه عاد كالسبطة الهميمة ، من فم الباب جحي جاء يجر فيه والعود مش حاب يتحرك حارن حرنة مش في الطريق ، جحي يدز والعساس يعاون بالذريع ما برم الخطوة ، هاو جحا مشى خمسة امتار خرج رئيس الشرطة يمشي بعود سمح نوع اللي شبحه جحي قبل شهر ، ...آآآآه رجعت ذاكرة الشويب المسكين وتفكر اك العود اللي تلاقى بيه وحس في نفسه بلي راه رئيس الشرطة ضحك عليه واعطاه العود الغالط ...

غاضاته جحي الزلبيحة وقرر بش ينتقم من رئيس الشرطة ، بصح كيفاش ؟
بقى جحي يفكر ويفكر ويوكل في اك العود اليابس قالك على الاقل نربح اجره كشما يترقع ، جت في باله فكرة راح للسوق وكل ما يلقى واحد يعرفه وحتى اللي ميعرفهمش يقوللهم بلي راه رئيس الشرطة عنده سر عجيب ، العود السمح اللي يدخله يحوله حمار قاسي الراس ويابس ، والعكس مع الحمار يحوله حصان ..

أهل السوق قالك حني عودنا كبروا وعادوا احمرة ميصلحوا لحتى شئ هيا ندوها لرئيس الشرطة كشما نستفادوا من عود صحيح يخدمنا .

تلموا الغاشي قدام مركز الشرطة واصوات الاحمرة تنهق في وسط الساحة خرج ليهم رئيس الشرطة وراحوله يجروا كل واحد حاب يبدل الحمار بعود صغير .
حار رئيس الشرطة من الغرابة وش كاين ؟!!!
وصل الحديث للوالي ، وحب يعرف مصدر الشوشرة مالا حقق في الامر وعرف بلي راه جحي هو اللي وصاهم عن هذي الفكرة .

نادى الوالي حجا وقاله وش كاين ؟ حكى جحي للوالي وش صراله مع رئيس الشرطة من نهار اللي تلاقوا الى حداثة دفع غرامة الماكلة تع الشهر .
الوالي قال لجحي بعد ما سمع كلامه ومن يشهد بلي راه رئيس الشرطة زلبحك ؟ قاله جحي هاهي الورقة تع المالكة نتاع الشهر ! وخرجله جحي الورقة

عندها كلم الوالي واحد من حراسه وقاله روح نادي رئيس الشرطة .
ركب رئيس الشرطة بالحصان الجميل وراح بيه لمكتب الوالي فإذا بيه يشوف في جحي عنده ، سأل الوالي رئيس الشرطة عن القصة ، فإذا برئيس الشرطة يكذب في جحي وقاله مكانش منها هالحديث الكل .
الوقت اللي كان فيه رئيس الشرطة يتحدث مع الوالي الحراس يجروا ويحسسوا حتان دخل العود الاصلي وراح لجحي كأن عزيز غاب عن عزيزه

وجحي راح يمسح في يده عن كرومته وكأنهم على علاقة ببعضاهم من بكري .
وقتها صدق الوالي كلام جحي وأمر انه يهز جحي العود لانه من حقه ، ...
وش مارايكم وينه رئيس الشرطة وش داروا معاه ؟ الحكاية نخليها معاكم وفكرولي وش نديروا معاه ؟

هههههههههههههه

عجبتني القصة وهي مسرودة بلهجة سوفية

يعطيك الصحة أسيرهـ

» موسوعة الوطن العربي خرائط ومعلومات عامة عن كل بلدان الوطن العربي
» من حسن الادب .....
» بحث حول الرثاء في الادب الاندلسي